السلام عليكم حبايبي ❤️ تكلمت قبل كم يوم عن مركز العناية بالشعر و البشرة و الي ما شاف الموضوع يشوفوا في داه الرابط
الي سويتو لريماس هو كيراتين اورقانك للاطفال و الحوامل مافي ريحة زي انواع الكيراتين العادية و خفيف فا يناسب الاطفال و ما يضر الحوامل ان شاء الله
و بما ان ريماس صغيرة حبيت اسويلها شي خفيف ما يضر شعرها ان شاء الله
طبعا شعر ريماس مرررة كرلي و مجعد و حبيت اسويلها شي تغيير تنبسط في.
اول شي جهزوا شعرها بجهاز النانو الي هو يحضر الشعر للكيراتين و يدي ترطيب و بعدين حطوا الكيراتين و خلو ٤٥ دقيقة بعدين غسلوا و استشوروا شعرها بعدين مشيوا علي بالبيبي ليس.
و هدي صورة لشعرها قبل و بعد و النتيجة بعد الاستحمام لما غسلت شعرها
زي ما انتو شايفين شعرها الكرلز في مرة خفت سارت على تموجات و شعرها سار في لمعة و الملمس سار انعم و ما يتشابك زي اول و تمشيطو سار اسهل و اسرع من اول. اول مسكينة تمشيط شعرها ياخد وقت عشان يتشابك كتير. و النفشة خفت منو بس ما اختفت بس اقدر اقول خفت ٥٠٪ عن العادة.
حسيت النتيجة حلوة و افضل من اول و طبعا راح اقلكم بعد فترة كيف شعرها و اذا سار تساقط لا سمح الله او لا.
اذا حابة تسوي كيراتين برضو شوفو موضوعي عن تجربتي لامازون كيراتين في البيت.
حبيت انوه على حاجة، في التدوينة الي فاتت قلت اني سويت جلسة بالخلايا الجذعية لشعري عشان عندي فراغات و سالت عنها اطباء جلدية و تجميل و كلهم اجمعوا ان الجلسة غلط لان الخلايا الجذعية لازم تنسحب من دم المريض يعني لازم يسحبو دم منك و يفصلوا الخلايا عن الدم و يحقنوها في فروة الرأس. فا ماني عارفة بالزبط ايش الي عملوا بس غلط!
فا ما راح اكمل باقي الجلسات افضل اروح عيادة احسن بس ممكن اسوي جلسات عناية فقط في المركز. فا اذا عندك مشاكل جلدية او تحتاجي علاج الافضل تروحي عيادات متخصصة اما المركز للعناية و الدلع.
بس حبيت انبه عشان امانتي ❤️
Stay Elegant
xoxo
ليست هناك تعليقات:
إرسال تعليق