السلام عليكم حبايبي ❤️ اليوم بتكلم عن ميك اب بيير رينيه الي وصلني من مركز العناية بالشعر و البشرة و هي ماركة بولندية
اول شي البرايمر، يثبت الميك اب لوقت طويل و يخلي البشرة مرة ناعمة بس عيبو في سيلكون و انا افضل ابعد عن السيلكون صراحة، و الفاونديشن جميل تغطيتو متوسطة و يندمج بسهولة و يدي فينش مات بس مرة ما طلع درجتي :( اغمق مني بكتير. بس يقعد كمان فترة طويلة من غير ما يسيح او يخف و انا ما استخدمت بودرة معاه.
البودرة المضغوطة مرة حبيتها خفيفة مرة و تثبت الفاونديشن و الحمدلله كانت درجتي و ناسبتني ❤️ و ما تحسي انها تسوي زي الطبقات على الفاونديشن بالعكس خفيفة ما تحسي فيها.
البرونز من الاشياء الي مرة حبيتها لونو جمييييل و طبيعي على البشرة و يدي دفئ مرة حلو بس عيبو مرة يتفتت يعني لما امرر الفرشة علي تطلع زي الفتافيت منو
الاي شادوز لونها مرة لفتني واحد بني غامق بشيمر و التاني لؤلؤي بشيمر مرة حبيتو لمدمع العين ❤️ بس لونها مو واضح لازم تعيدي اكتر من مرة عشان يبان اللون و كمان مرررة يتناثر بس ثباتها كويس
الماسكرا اكتر شي حبيتو في المجموعة كلها تدي طول و تقويس مرة حلو للرموش و تفرقها عن بعض ابدا ما تخلي الرموش ملصقة بس ما تدي كثافة بس سرت كتير ادمجها مع ماسكرا ثانية للكثافة بس برضو حبيتهااا مرة
اللوس شادو او الشادو المنثور لونو يجننننن و قوي مرة بس لازم تعرفي كيف تتحكمي في طبعا داه الشي ينطبق على كل اللوس شادوز بس لونو عذاااب من الاشياء الي حبيتها. جاني قلتر كمان للعين بس صراحة ما اعرف استخدم القلتر و يبغالو صمغ و طريقة معينة فا ما جربتو والله.
اليمين قلوس لونو مرة حلو بس خفيف طبعا لانو قلوس ما يدبق او يلزق كتير فا حبيتو عشان كدة بس لازم احط قبلو روج تاني لان احب اللون يكون واضح و التاني روج بينك في لمعة ما عجبني اللون ابدا ما يناسبني و ما احب الارواج الي فيها لمعة بس مرة كريمي و احس يدي ترطيب للشفايف و ثباتو حوالي ٣ ساعات تقريبا و يروح مع الاكل
المناكير لونو يجنن بس يبغالو اكتر من طبقة وحدة تخلي اللون خفيف هو تقريبا غلوسي و شوية يطول عشان ينشف بس حبيت اللون.
هدا رأي بكل امانة اتمنى لو المركز يجيب مكياج افضل لان صراحة احس المكياج ما يليق بمركز كبير و سمعتو رائعة و فخم احس افضل لو يدوروا ماركة مكياج افضل من هدي من حيث الجودة لان المركز صراحة جميل فا حرام المكياج الي عندهم بهدي الجودة لان ما شاء الله كل شي عندهم ممتاز. و تحت تجربتي مع المركز
Stay Elegant
xoxo
ليست هناك تعليقات:
إرسال تعليق