السلام عليكم حبايبي ❤️ اليوم جبتلكم مقشر شفايف تقدروا تسوا بنفسكم في البيت و طرق تانية تقدري تعمليها اذا مو متوفرة عندك المكونات.
طبعا ضروري تقشري شفايفك لان تقشير الشفايف يزيل الجلد الميت و ينعم الشفايف و كمان يساعد في توريد الشفايف. و كمان يخلي منظر الروج احلى على شفايفك لان دحين كتير طالعة الارواج المات (المطفية) و هدي عيبها تبين عيوب الشفايف اذا فيها جلد ميت و كمان تنشف الشفايف فا تحتاجي تقشريها كل يومين او يوم ورا يوم و شوفوا تدوينتي تحت عن الشفايف برضو
نصائح لشفايف وردية
نصائح لشفايف وردية
طيب دحين كيف تقشري شفايفك؟ انا هدي طريقتي في تقشير الشفايف اعملو بنفسي و هدي المكونات
اول شي طبعا السكر و تقدري تستخدمي السكر الابيض او البني على كيفك و حطي الكمية الي تحتاجيها
تاني شي الزيوت هي تاني اهم مكون و تقدري تستخدمي الزيوت الي تحبيها او الي متوفرة عندك اهم شي تكون طبيعية ١٠٠٪ و انا استخدمت هدي الزيوت كلها من موقع اي هيرب.
الزيوت الي حطيتها: زيت الجوجوبا، الافكادو، فيتامين هـ، الورد، اللوز.
و حطيت مرطب فازلين للشفايف (هدا اخدتوا من لندن في فازلين شفايف متوفر عند التاجرات و بعض الصيدليات يكون تعليبو غير) و تقدروا تستخدموا الفازلين العادي و انا ضفت مرطب اخدتوا من اي هيرب مرة ممتاز و تكلمت عنو كم مرة في حسابي و تقدروا تكتفوا بالفازلين. و طبعا تحتاجوا علبة فاضية.
اول شي تحطي الزيوت على السكر انا صراحة حطيت بعيني شوية من كل زيت انتي على حسب كمية السكر الي استخدمتيها و حطيت علبة الفازلين كاملة و نص ملعقة من المرطب التاني. و بس خلطتهم مع بعض كويس و حطيتهم في العلب.
طريقة استخدامو انك تبللي شفايفك و تاخدي شوية من المقشر و تمسجي شفايفك بشكل دائري لمدة دقيقة و بعدين تغسليها و رطبي شفايفك بعدها او اكتفي بمرطب الي في اذا حسيتي ما تحتاج انا احب ارطبها برضو.
تقدري تحطي من الزيوت الي متوفرة عندك بس اذا حابة تحفظي المقشر لفترة لا تحطي زيت زيتون عشان يدوب السكر و اذا بس تسوي حق استخدام واحد حطي زيت زيتون.
و في مقشرات شفايف كتير تقدري تعمليها زي مثلا:
١. سكر و عسل.
٢. سكر و زيت جوز هند.
٣. سكر مع فازلين
٤. قهوة مطحونة مع زيت زيتون.
٥. سكر مع زيت زيتون و عصير ليمون.
٦. سكر و زيت نعناع.
٧. تقدري تبللي شفايفك و تجيبي منشفة ناعمة و تمسجي شفايفك بشكل دائري لمدة دقيقة هدي برضو تقشر الشفايف.
٨. فرشة اسنان مع فازلين. الطريقة انك تحطي فازلين على شفايفك و تجيبي فرشة اسنان و لازم تكون ناعمة او حقة اطفال و تكون الشعرات مستقيمة و تمسجي بشكل دائري و تقدري تغسلي شفايفك و ترطبيها او تخلي الفازلين عشان يرطبها.
طبعا اغلب الطرق هدي ضروري ترطبي شفايفك بعدها (ما عدا الاخيرة يمكن) لان الترطيب خطوة مهمة مرة.
في مقشرات جاهزة زي ايلف و ذي بودي شوب ما اقتنعت فيها احسها خشنة على الشفايف فا الافضل تسوي بنفسك و الطريقة مرة سهلة 👍🏻.
اتمنى انكم استفدتوا
Stay Elegant
xoxo
ليست هناك تعليقات:
إرسال تعليق