الخميس، 9 يوليو، 2015

تجهيزات العيد (العناية بالوجه)


السلام عليكم حبايبي ❤️ اليوم ابدا اول موضوع في سلسلة تجهيزات العيد 💕 ان شاء الله 👍🏻

في بنات يحبوا يبدئوا قبلها باسبوع او اكتر انا صراحة احس يومين بالنسبة للوجه كفاية 😁 يعني قبل العيد بيومين  الا اذا انتي عندك تصبغات و مشاكل جلدية هدا يبغالها وقت طويل للمعالجة. 

انا اتكلم عن التجهيزات العادية زي التقشير و الترطيب و التنضيف العميق و و و 😁

 طيب ليش نقسمها على ايام؟ عشان لا ترهقي بشرتك انك تسوي كل شي في نفس اليوم ممكن تتهيج او تتعب البشرة عشان كدة الافضل نقسمها على كم يوم 👌🏻

و طبعا تقدري تغيري الخطوات على كيفك او تضيفي اشياء على كيفك و اهم شي تستخدمي منتجات تناسب بشرتك و احتيجاتها و لا تستخدمي شي جديد! لان ما تعرفي كيف بشرتك راح تتفاعل معاه عشان كدة افضل تستخدمي منتجات متعودة عليها ❤️

و بسم لله نبدأ

اليوم الأول

١. غسل البشرة



اول شي غسلي بشرتك بغسولك المفضل و استخدمي جهاز تنضيف اذا عندك او فرشة تنضيف للوجه او ممكن منشقة ناعمة كمان. وزعي الغسول على كامل وجهك و نضفي بشكل دائري باستخدام الجهاز او الفرشة او المنشفة.

هدي الغسولات الي استخدمها حاليا و استخدم كلارسونيك 

بعدها بخي على وجهك موية ورد باردة او موية باردة عادية عشان تهدي وجهك شوية.

 ٢. التخلص من الشوائب العميقة



هدي الخطوة ننضف فيها البشرة بعمق و في كم طريقة اول شي باستخدام ماسك منقي زي ماسك الشوكلاته من فارم هاوس (ما يناسب البشرة الحساسة) او الطين الاوربي او المغربي (اذا حساسة استخدمي المغربي، و اذا بشرتك جافة ضيفي عليها زيت الهوهوبا عشان لا ينشف بشرتك مرة) او تستخدمي البخار عشان تنضفي وجهك و كتبت تدوينة كاملة عن طريقة البخار الصحيحة في الرابط تحت. 


٣. تجهيز البشرة للترطيب



بخي موية ورد تاني و مسحي وجهك بقطنة او استخدمي تونر اذا عندك و نضفي رقبتك بالتونر و الافضل اسكنول مرة ممتاز لتفتيح و تنضيف الرقبة و ضروري يكون عند كل بنت و اذا بشرتك تتحسس منو استخدمي التونر. و اذا تستخدمي سيرم استخدمي دحين.

٤. الترطيب 



رطبي بشرتك زي ما ترطبيها يوميا، جميع البشرات يبغالها ترطيب حتى لو دهنية اهم شي تستخدمي الي يناسب بشرتك. و هدا المرطب الي استخدموا حاليا يناسب البشرة الجافة و اخدتو من اي هيرب.


اليوم الثاني

١. التقشير



قشري وجهك بالمقشر العادي الي تستخدمي انا احب استخدم سينت ايفز 👌🏻 الي يمين مقشر يناسب الحساسة و الجافة و الثاني غسول و مقشر مع بعض خفيف مرة يناسب الحساسة.

او ممكن تستخدمي مقشرات طبيعية لوجهك (اهم شي تجربي على جزء بسيط و تتاكدي انو يناسب وجهك و ما تتحسي منو)

١. عسل و سكر
٢. نوع من انواع الزيوت (جوز هند، هوهوبا، لوز) مع سكر
٣. شوفان و لبن

قشري وجهك بحركة دائرية و غسلي بموية دافية و بعدين بخي موية ورد او موية باردة او بخاخ مهدئ زي ذاه البخاخ من بوتانيكس او بخاخ افين او ايفيان



٢. ماسك 

استخدمي ماسك للوجه اما جاهز او سوي في البيت انا احب استخدم ماسكين ماسك بعد استحمام العيد والي هو ماسك مرطب او ماسك عادي زي ماسك زيت الزيتون مرة جميل (تكلمت عنو في حسابي في الانستقرام) 



و ماسك قبل ما اتجهز للمناسبة بساعة الي هو ماسك مفتح او منعش للبشرة و في كم واحد زي

١. لبن زبادي و نشا و موية ورد
٢. نشا و موية ورد 
٣. زيت فيتامين و لبن زبادي و نشا
٤. شاي اخضر مع لبن زبادي

ملاحظة: ممكن تضيفي ملعقة عسل مع اي ماسك ينقي البشرة بس اهم شي تتاكدي انك ما تتحسي منو

و في ماسكات كتير ممكن تسويها في البيت

٣. تكرري خطوة تحضير البشرة و الترطيب 

٤. ترطيب العيون



هدي الخطوة برضو احب اسويها الي هي ماسك لتفتيح الهالات من جميلة عربية و كتبت تدوينة كاملة عنها تحت


هدا الماسك تقدري تحطي و تنامي في او تقعدي في قريب ٥ ساعات راح يفتح المنطقة عندك اذا كان عندك هالات و يرطب المنطقة. 

و في كمان طرق تفتح المنطقة عندك مؤقتا اذا تبغي حل سريع بس طبعا ترجع بعد فترة زي:

١. البطاطس: اطحنيها و حطي الخليط حولين عينك او حطي في قطنة و خليها على عينك لمدة اقل شي ربع ساعة بس اهم شي ترطبي حولين عيونك بعدها لان البطاطس يجفف البشرة.

٢. نقعي قطنة في بابونج او شاي اخضر و خليها منقعة فترة بعدين قسمي القطنة نصين و حطي كل نص تحت عينك على الهالات.

هدي الطريقتين زي الي تنعش الهالات شوية 😁

٥. الترطيب قبل الميك اب



اذا انتي خارجة صباح العيد اول شي استخدمي واقي شمس اهم شي عشان الشمس خاصة في الصيف راح تعدملك بشرتك.

رطبي قبل المكياج بمرطب خفيف بعد الواقي هدي المرطبين تناسب جميع انواع البشرة و خفيفة مرة. طبعا هدي الاتنين كريمات نهارية. اليمين من بودي شوب و التاني من بوتانيكس في صيدلية بوتس.



اذا خرجتك في الليل استخدمي مرطب خفيف عادي قبل ❤️.

٦. تقشير الشفايف

تقشير الشفايف يكون يوميا و قبل ما تحطي المكياج. هدا مقشر سويتو في البيت و تكلمت عنو في حسابي في الانتسقرام عبارة عن فازلين الشفايف و زيت فيتامين اي و زيت هوهوبا و زيت لوز حلو و مع مرطب شفايف تاني و سكر و تقدري تستخدمي بس فازلين و سكر او زيت و سكر و تقشري شفايفك بمنشفة ناعمة او فرشة اسنان اطفال و رطبي شفايف بعدها و طول اليوم و هدي مرطباتي المفضلة.



و هدي تجهيزاتي ❤️ زي ما قلت هدي خطوات خفيفة تسويها و تحضرلك بشرتك تقدري تضيفي و تغيري على كيفك بالي يناسب بشرتك. انا احب اسوي خطوات خفيفة عشان اقدر الحق خاصة كأم يدوب تلحقي تحطي كريم 😂 فا حبيت الموضوع يكون خفيف عشان يناسب الكل ❤️

Stay Elegant
xoxo 

ليست هناك تعليقات:

إرسال تعليق